Ég er búin að vera grasekkja um helgina og notaði tækifærið og dreif mig á flóamarkað, "loppemarked" eins og það kallast hér í Noregi, er mjög vinsælt fyrirbæri hér og flestir barnaskólar/unglingaskólar hafa markaðsdag, bæði á haustin og vorin. Yfirleitt er það skólahljómsveitin sem stendur fyrir því til að safna pening. Ég skrapp semsagt á flóamarkað í Sagene-skóla í gær og verð bara að segja að sjaldan hef ég verið á jafn slöppum "loppis" .. :/
Svo það var pínu skúffandi. Ég keypti þó, nokkra reyfara og svo nældi ég í ljóðabók eftir Stein Mehren (helsta núlifandi ljóðskáld norðmanna) handa KJóa mínum :) Svo hann fær smá surprise þegar hann kemur tilbaka. Honum finnst nefnilega mjög lítið til þessara flóamarkaðsferða minna koma og er ekkert að leyna þeirri skoðun sinni heldur. Hinsvegar náði ég einu sinni í bók eftir Ivo Andrich (sem fékk Nóbelsverðlaunin 1961, það er lítið fáanlegt eftir hann á norsku núna) og gaf Ragnari kollega mínum (sem hefur mikið dálæti á honum) og KJ er varla búinn að fyrirgefa mér það enn. Það þótti mér nú ágætis Litla Gula Hænan dæmi..
Þetta var samt voða huggulegur dagur -þrátt fyrir slappan flóamarkað- langt síðan ég hef bara verið að rölta ein í bænum á laugardegi og í ofanálag var svo ljómandi gott veður, svo ég gekk alla leið frá Sagene niður í bæ. Gekk þá í gegnum Grünerløkka sem er voða kósí og líflegt hverfi, með mikið af kaffihúsum og litlum búðum, fékk mér gott kaffi á ítölskum kaffibar og keypti splunkunýja kókosbollu í Den lille kokosbollefabrikken. Jömmí!
Var að hugsa um að fara út í smá gönguferð í dag, en það er hálf rigningarlegt úti, svo kannski ég hreiðri bara um mig í sófanum og lesi í þessum reyfurum sem ég nældi í í gær :)